我的箍牙過程記錄分享(六) 清潔+橡筋篇

見到自己 D牙既咬合位越來越齊真係好興奮 !!!上鏡都好睇左~~
18號和22號只係相差幾日, 已經見到有分別

下排牙慢慢對齊上排牙的尖位
下個星期應該可以拆牙箍 !!
唔使再花勁耐時間清潔牙齒 ( 真係開始好累好厭 )

睇返未上橡筋前 26.10.2016上下排牙的尖位是完全不對的

自從上箍後
平時一食完飯, 就有勁多菜同飯或麵
停留左喺左右兩邊大牙既位置
如果喺街, 只帶備牙縫刷
都要清理 5分鐘左右 (超累又唔方便)
如果有時忘記了帶, 只有牙籤就慘了
總會有D 位清唔到, 超唔舒服

喺屋企食完飯
可以用牙刷快清一次
再用牙縫刷清Details 位
晚上睡前再用牙膏、牙刷、牙縫刷、單頭刷清潔

聽落好似一定會乾淨晒
但其實有時朝早刷牙, 有時刷刷下...都發現
E! 仲有食物殘渣既? 😤
真係好怕會蛀牙, 好彩暫時都無

上箍一年零一個月, 終於去到最後階段箍橡筋
可以見到 D 橡根係咩樣 😁
好有曙光 !!
食飯前要除落黎, 食完飯勾返上去
聽落都好合理無咩問題

但其實成日都食野, 好唔方便
一日食 5次野, 好似我上摩天輪前都食左個墨西哥卷
即係一日要拆 > 清潔 > 再勾 5次

有時去餐廳食飯
周圍都係人, 又無洗手間
喺朋友面前拆出黎又好肉酸
試過有次同朋友食lunch 去茶餐廳食車仔麵
無除落黎都得, 只係個口不能張開得太大😏

之後有次同一班人飲茶, 又唔見洗手間喺邊
照樣諗住唔拆照食野
點知出事!
食完成個鐘先發覺唔見左其中一條
即係我已經食左條橡根落肚😰

諗返先記起
上一次無事, 係因為勾住尾二隻牙箍
個勾係比較長和深

上次用狐狸仔, 今次用企鵝先生

今次出事係勾住最尾的大牙
個勾係比較短, 橡筋比較長, 力度亦不同
今次 D 牙緊好多

而且勾喺最尾的大牙之後
開始每朝起身刷牙時內側都好痛😣
類似最初一上箍有牙菌膜咁
但用左單頭刷+ 漱口水都係無幫助
跟住有幾日箍返喺尾二果隻都係痛

終是問下何醫生點算好
醫生就話, 如果真係好痛就停用橡筋, 再痛就要提早覆診

咁我就停了一星期等覆診
又真係慢慢無咁痛
牙痛真係慘過大病
雖然只係1 cm 面積左右, 但足以影響整個星期的情緒😞

去覆診, 才知道因為之前脫了智慧牙
右邊大牙無了後面的智慧牙頂住會比較鬆
以致會有痛的感覺

終是改返, 只勾橡筋在尾二隻牙
用短的, 白兔仔橡筋
希望順利記得日日夜夜都乖乖地勾
下星期一可以拆得 !!

上一篇: 我的箍牙過程記錄分享(五) 鼻敏感 x 寒背篇
下一篇: 我的箍牙過程記錄分享(七) 拆箍前的小插曲