🇧🇳Brunei 汶萊旅遊初體驗🇧🇳Day 1

今次慶祝8th結婚周年紀念，想去一個既温暖又安全嘅渡假地方，遠離城市嘅繁囂，而東南亞國家當中，有一個我哋都未去過嘅國家，所以就選擇咗汶萊。一個被譽為「東方杜拜」，富有的石油國家，有汶萊王子，吳尊嘅出生地。

乘坐汶萊皇家航空✈️機上大部份都係印傭，佢哋轉機回家鄉，攞行李嘅運輸帶，只有幾個人係入境嘅旅客。到達汶萊機場🎫先發現我哋嘅漫遊數據plan都係唔包括汶萊(其實只係馬來西亞嘅周邊國家，估唔到會唔包)連機場兩間賣sim card嘅商店都關門，當時只係17:30左右。出到機場門口，連的士條隊🚕都唔多覺眼，只係有位踢拖嘅叔叔，一身度假打扮，問我我哋係咪搭的士？知道我哋住J Hotel之後，就指住個價錢牌，牌上已經列明係收20蚊當地錢（乘6 大約等於$120港元）

沿路都係樹木🌲草🌿小鎮平房，全部都好矮，唯一比較靚嘅就係清真寺，有兩間特別出名，金色屋頂，仲有經過著名嘅加東夜市。

入住新酒店🏨舊年先起好，慶祝周年紀念都準備咗唔少心思，有好多汽球🎈以為門口嘅波識飄起，點知原來係用膠紙貼喺天花板😆設施新，但比較環保同簡約，嗽口水杯得一隻，連拖鞋都冇提供，張床好舒服，電視播映用AI 動話做MV嘅歌。

夜晚行路15分鐘左右，去咗大型商場The Mall Gadong，無斑馬線過行人路，不過過車路都好安全，但周圍都無人，商場外圍好黑。對面麥當勞一個餐都超過$100😮

由地下到商場頂樓揾咗好多間，門口似乎有賣Sim Card 但都係話賣晒，叫我哋去另一間，最後一間要用$120買卡，再加$60先有8GB，職員仲要輸入好多次數字先完成設定，而且只收現金💰真係回到過去嘅香港。

成個商場都好似香港舊屋邨商場，有老派嘅酒樓式表演傳統音樂，文具玩具店意外地多淘寶翻版公仔精品，有正版又為人熟悉嘅品牌就有鞋店Sketches同埋Dr. Kong,仲有飾物店Pandora。最後去咗商場門口一間有燈飾、有wifi、可以收信用卡嘅餐廳食Buffet 。有熟悉的中式、西式、日式、中東、馬來食物味道，都正常又好食嘅，有驚無險地渡過第一天😆